МАНДАХ ИХ СУРГУУЛЬ “МОНГОЛ ИНЖЕНЕР-2026” УЛСЫН ОЛИМПИАДАД АМЖИЛТТАЙ ОРОЛЦЛОО.

“Монгол Инженер” нэгдсэн арга хэмжээ нь 2026 оны 4 дүгээр сарын 23-аас 4 дүгээр сарын 26-ны хооронд 14 их сургууль, коллеж, 20 гаруй компани, аж ахуйн нэгжүүдийн хүрээнд  амжилттай зохион байгуулагдлаа. Уг нэгдсэн арга хэмжээний ерөнхий зохион байгуулагчаар ШУТИС, Монголын Инженерүүдийн Холбоо, ТЗИС хамтран зохион байгуулагчаар Мандах Их Сургууль, ХААИС, ҮБХИС, МГТИС бусад компани аж ахуйн нэгжүүд оролцож үйл ажиллагаа дараах чиглэлүүдээр зохион байгуулагдлаа. Үүнд:  

• Сургалт, семинар, хэлэлцүүлэг, үзэсгэлэн
• Эрдэм шинжилгээний хурал
• Онолын механик
• Материалын эсэргүүцэл
• Механизмын дизайн
• Машины эд анги
• CAD/CAM/CAE хичээлүүдийн олимпиад

Тус нэгдсэн арга хэмжээнд Мандах Их Сургуулийн хувьд бүх үйл ажиллагаанд идэвхтэй оролцлоо. 

1. Олимпиадын төрөлд Мандах Их Сургуулийн “Механик инженерчлэл” хөтөлбөрийн 2-4 түвшний 15 оюутан 5 хичээлийн чиглэлээр амжилттай оролцлоо. Үүнээс:

• “Механизмын дизайн”  хичээлийн олимпиадад “Механик инженерчлэл” хөтөлбөрийн 2-р түвшний оюутан Ц.Дөлгөөн хүрэл медаль
•  “Машины эд анги” хичээлийн олимпиадад “Механик инженерчлэл” хөтөлбөрийн 4-р түвшний оюутан Ө.Цэрэнсувд хүрэл медаль
• “Машины эд анги”  хичээлийн олимпиадад “Механик инженерчлэл” хөтөлбөрийн 3-р түвшний оюутан Ч.Энхчимэг 4-р байрт шалгарлаа.

2. “Монгол Инженер -2026” ЭШХ-ийн шүүгчийн бүрэлдэхүүнд Мандах Их Сургуулийн сургалт эрхлэсэн проректор Ч. Төрбадрах ажиллалаа. Мөн СШИУТ-ийн багш Н.Золбоо, М.Мөнхгэрэл, Д.Түвшинжаргал нар “Өндгөн тулгуурын техникийн байдлыг тогтоох зарим боломж” сэдвээр ханан илтгэлийн төрөлд амжилттай оролцлоо.