Японы Тохоку их сургуулиас гадаадын их дээд сургуулийн оюутнуудын дунд зохион байгуулсан онлайн арга хэмжээний хаалтын үйл ажиллагаанд Мандах их сургуулийн оюутнууд оролцлоо

A- A A+
Японы Тохоку их сургуулиас  гадаадын их дээд сургуулийн оюутнуудын дунд зохион байгуулсан онлайн арга хэмжээний хаалтын үйл ажиллагаанд Мандах их сургуулийн оюутнууд оролцлоо

Японы Тохоку их сургуулиас гадаадын их дээд сургуулийн оюутнуудад зориулсан онлайн уулзалт, арга хэмжээг 2021 оны 4-р сарын 8 -наас 5-р сарын 27-ныг хүртэл зохион байгуулсан билээ. Энэхүү арга хэмжээний хаалтын үйл ажиллагаа өчигдөр онлайн хэлбэрээр зохион байгуулагдаж, амжилттай  болж өндөрлөлөө.  

Дэлхийн өнцөг булан бүрээс оролцсон оюутнууд бүтэн хагас сарын турш нэгэн сэдвийн дор нэгдэн, хэлэлцүүлэг өрнүүлэх, санал бодлоо солилцох, бие биенээсээ суралцах зэргээр өөр хоорондоо харилцаж, туршлагаа хуваалцсан юм.

 Хаалтын арга хэмжээнд бүлэг болон хуваагдсан оюутнууд “Дэлхийн нийтийг хамарсан  цар тахал улс орнуудад хэрхэн нөлөөлж байна вэ?” гэсэн ерөнхий сэдвийн дор  өөрсдийн улс  орны жишээн дээр тайлбарласан илтгэлийг хэлэлцүүллээ. Нийт 13 илтгэл хэлэлцүүлснээс бүлгээ төлөөлөн, Мандах их сургуулийн Магистрын хөтөлбөрийн оюутан Т. Намуун “Улс орнуудын цар тахалтай  тэмцэж буй арга хэрэгсэл” сэдвээр, Санхүү, менежментийн 2-р дамжааны оюутан Э. Цацрал “Хөдөлмөр эрхлэлт ба   эдийн засагт   Ковид-19 цар тахлын нөлөөлөл” сэдвээр  тус тус илтгэл тавьж,  амжилттай хэлэлцүүллээ.

Арга хэмжээнд ХБНГУ, Дани, Румын, Грузин, Польш, Тунис, Индонези, Япон, Колумб, Вьетнам, БНХАУ, Итали зэрэг 13 орны их дээд сургуулийн бакалавр, магистрын хөтөлбөрийн  40 гаруй оюутнууд оролцсон бөгөөд зохион байгуулагч Тохоку их сургуулийн зүгээс энэхүү арга хэмжээнд өндөр ач холбогдол өгч, илтгэл бэлтгэж оролцсон нийт оюутнуудад талархал илэрхийллээ.

Манай улсад Ковид-19 цар тахлын улмаас бий болсон хүндрэл бэрхшээл, сөрөг асуудлууд бусад орнуудад нэгэн адил тохиолдож байгааг  илтгэлүүдээс тодорхой харагдаж байлаа.

Сургуулийн захиргаа